सांगली :

शहरातील कृष्णा नदी रोडवर बेकायदेशीर विक्रीसाठी आणलेल्या तलवारीचा साठा कुपवाडच्या तरुणांकडून पोलिसांनी जप्त केला. त्याच्याकडून दहा तलवारी आणि एक मोटारसायकल असा एकूण 65 हजारांचा मुद्देमाल हस्तगत केला. सांगली शहर पोलीस ठाण्याच्या गुन्हे प्रकटीकरण शाखेने सदरची कारवाई केली. या प्रकरणी भगतसिंग विक्रमसिंग शीख (वय 21 रा. नेहरूनगर, कुपवाड) याला अटक करण्यात आली आहे. 

SANGLI CRIME :  पोत्यात तलवारी भरून विकणार्‍या कुपवाडमधील तरूणास अटक 

याबाबत अधिक माहिती अशी कि, सांगली शहर पोलीस ठाण्याच्या गुन्हे प्रकटीकरण शाखेचे एक पथक अवैध शस्त्रांवर कारवाई करण्यासाठी पेट्रोलिंग करत होते. यावेळी पथकातील कर्मचारी संतोष गळवे यांना माहिती मिळाली कि, एक तरुण सांगली ते आष्टा मार्गावरील कृष्णा नदी रोडवर बेकायदेशीर तलवारीचा साठा विक्री करण्यासाठी येणार आहे. 

मिळालेल्या माहिती प्रमाणे पथकातील कर्मचार्‍यांनी त्याठिकाणी तातडीने सापळा लावला असता संशयित भगतसिंग शीख हा फिरताना दिसला. यावेळी त्याला ताब्यात घेऊन तपासणी केली असता त्याच्या जवळ असलेल्या मोटारसायकलच्या कॅरेजला असलेल्या पोत्यात दहा तलवारी मिळाल्या. या तलवारी बाबत त्याच्याकडे चौकशी केली असता त्याने सदरच्या तलवारी या विक्री करण्यासाठी आणल्याचे सांगितले. 

यावेळी त्याच्याकडून दहा तलवारी आणि एक मोटारसायकल असा एकूण 65 हजारांचा मुद्देमाल जप्त केला. सदरची कारवाई पोलीस निरीक्षक संजय मोरे, हेडकॉन्स्टेबल संदीप पाटील, सचिन शिंदे, मछिंद्र बर्डे, रफिक मुलाणी, विनायक शिंदे, संतोष गळवे, गौतम कांबळे, संदीप कुंभार, पृथ्वीराज कोळी, सुमित सूर्यवंशी, योगेश सटाले, गणेश कांबळे यांच्या पथकाने केली. दरम्यान, सदरच्या तलवारी या शीख याने कोठून आणल्या आहेत तसेच अशा प्रकारे आणखी किती विक्री केल्या आहेत याची चौकशी सुरु असल्याचे पोलिसांनी सांगितले.