माळवाडीत व्याजावरील पैशांचा दंड देण्यासाठी पती-पत्नीला घरात घुसून बेदम मारहाण

 

सांगली : व्याजाने घेतलेले पैसे मुद्दल आणि व्याजासहित परत करून देखील व्याजावरील दंड दिला नाही म्हणून तरुणाच्या घरात घुसून तिघांनी पती-पत्नीला लाथाबुक्क्यांनी बेदम मारहाण करून जखमी केल्याची घटना घडली.

 

व्याजावरील पैशांचा दंड देण्यासाठी पती-पत्नीला घरात घुसून बेदम मारहाण : 

माळवाडीतील घटना : महिला सावकारासह तिघांवर गुन्हा दाखल. 

 सदरची घटना हि रविवार दि. 21 जानेवारी रोजी सकाळी दहा आणि सोमवार दि. 22 जानेवारी रोजी पहाटे साडे पाच वाजण्याच्या सुमारास माळवाडी येथे घडली. या प्रकरणी जखमी प्रकाश राजाराम मळवडे (वय 26 रा. माळवाडी) यांनी सांगली ग्रामीण पोलीस ठाण्यात फिर्याद दिली आहे. त्यांच्या फिर्यादीवरून पोलिसांनी संशयित सावकार महिलेसह तिघांवर गुन्हा दाखल केला आहे. छाया दानेकरी, प्रशांत दानेकरी आणि अभिजित दानेकरी (सर्व रा. माळवाडी ता. मिरज) अशी गुन्हा दाखल झालेल्यांची नावे आहेत. 

याबाबत अधिक माहिती अशी कि, जखमी प्रकाश मळवडे हे आपल्या कुटुंबियांसह मिरज तालुक्यातील माळवाडी मधील जैन बस्ती जवळ राहतात. प्रकाश मळवडे यांनी संशयितांकडून व्याजाने पैसे घेतले होते. सदरची मुद्द्द्ल आणि व्याज प्रकाश मळवडे यांनी संशयितांना परत दिली होती. 

रविवार दि. 21 जानेवारी रोजी सकाळी दहा आणि सोमवार दि. 22 जानेवारी रोजी पहाटे साडे पाच वाजण्याच्या सुमारास संशयित तिघेजण मळवडे यांच्या घरी आले. त्यांनी व्याजावरील दंड का दिला नाहीस असे म्हणून प्रशांत दानेकरी याने लाकडी काठीने मारहाण करण्यास सुरवात केली. छाया दानेकरी आणि अभिजित दानेकरी यांनी लाथाबुक्क्यांनी मारहाण करत शिवीगाळ केली. यावेळी प्रकाश मळवडे यांच्या पत्नी अक्षता मळवडे या मध्ये आल्या असता त्यांना धक्काबुक्की करत मारहाण करण्यात आली. 

घडलेल्या या घटनेनंतर जखमी प्रकाश मळवडे यांनी सांगली ग्रामीण पोलीस ठाण्यात फिर्याद दिली. त्यांच्या फिर्यादीवरून पोलिसांनी महाराष्ट्र सावकारी अधिनियम अंतर्गत संशयित तिघांवर गुन्हा दाखल केला आहे.