गाडीच्या काचा फोडून चोरी करणाऱ्या दोघांना केली अटक

 २० हजारांचा मुद्देमाल केला जप्त. 

जनप्रवास । प्रतिनिधी

सांगली : शहरात गाडीच्या काचा फोडून चोरी करणाऱ्या शिराळा तालुक्यातील दोघांना शहर पोलिसांच्या गुन्हे प्रकटीकरण शाखेने अटक केली. सादर लक्ष्मण जावळे (वय २५) आणि अमन महम्मद शेख (वय २३ दोघे रा. मांगले) अशी अटक केलेल्यांची नावे आहेत. या दोघांकडून चोरीची रक्कम आणि गुन्ह्यात वापरलेली मोटारसायकल असा २० हजार ५०० रुपयांचा मुद्देमाल जप्त करण्यात आलाय. 

सांगली शहरातील आझाद चौक येथे काही दिवसांपूर्वी एका गाडीची काच फोडून त्यातील रोख रक्कम अज्ञात चोरट्यांनी चोरून नेली होती. या प्रकरणाचा तपास करत असताना गुन्हे प्रकटीकरण शाखेचे कर्मचारी संतोष गळवे आणि गौतम कांबळे यांना माहिती मिळाली कि, दोन संशयित व्यक्ती या ट्रक अड्डा येथे फिरत आहेत. मिळालेल्या माहिती प्रमाणे पथकातील कर्मचाऱ्यांनी त्या ठिकाणी सापळा लावून दोघांना जेरबंद केले. त्यांना ताब्यात घेऊन त्यांच्याकडे कसून चौकशी केली असता दोघांनी आझाद चौक येथील एका कारची काच फोडून त्यातील रोख रक्कम चोरल्याची कबुली दिली. यावेळी दोघांकडून चोरीतील रोख रक्कम आणि मोटारसायकल असा एकूण २० हजार ५०० रुपयांचा मुद्देमाल जप्त करत त्यांना अटक केली. सदरची कारवाई पोलीस निरीक्षक अभिजित देशमुख, उपनिरीक्षक महादेव पोवार, संदीप पाटील, संतोष गळवे, गौतम कांबळे, गुंडोपंत दोरकर, गणेश कांबळे, योगेश सटाले यांच्या पथकाने केली. दरम्यान, दोघांना न्यायालयापुढे उभे केले असता एक दिवसाची पोलीस कोठडी सुनावली आहे. दोघांकडून आणखीन चोरीचे गुन्हे उघडकीस येण्याची शक्यता पोलीस निरीक्षक अभिजित देशमुख यांनी व्यक्त केली.